«Vier Jahr hemmer zeme d Schuelbank druckt, ganz viel glacht und vilicht au chli brüelet, s sonafe uf und au wieder abbaut, sind im chlosterpark glege, hend eus um pizzabrötli gstritte, mitde renata pläuderlet, sind in fluss gumpet und um de fluss grennt, sind go blüemli fürs herbarium pflücke, hend eus d mitternachtsformle ihprügle lah und wüssed jetzt hoffentlich wiene sinusfunktion usgseht. Mir hend mit de lehrer pläuderlet und ab und zue au diskutiert, verflueched n + 1, sind fast verfrore ade wiehnachtsfiir und sind ahfangs juli ide spinni schier verschmachtet.
Ja mir hend viel zemme erlebt, all uf ihri eigeti wis aber doch hend alli gwüsst vo wasem mir reded. Mir hend viel glertn da ade Kanti. Mir wüssed jetzt alli was e redoxreaktion und wases endoplasmatischs retikulum isch, aber ich glaub das isch nödmal s wichstigste womer us de zit da chönd mitneh. I de letschte vier jahr im chloster hemmer eus selber kenneglernt und mir hend eus chöne entfalte.
Mega wertvoll isch natürli s’kritische und s’eigne denke wo mir a dere schuel vertüft hend. Dasmer nöd alles eso nimmt wies grad würkt und dasmer eus gedanke mached zu aktuelle wie au vergangene sache. All wo da hocked hend d’kapazität guet vo schlecht, richtig und falsch usenand zhalte. Mir sind froh chönd mir nach dene vier jahr es bewusstsi für das was um eus ume passiert schaffe und analysiere, aber au aktiv a de gschehnis teilha. Und trotzdem wüssemer glich, dass mir eigentlich nüt wüssed.
Mir sind i dene 4 jahr vo eusne lehrer oft bestärkt worde, dass mir „delite vode schwiz“ oder „die zukünftige bundesröt“ sind. Und au wenn das schön tönt, ischs wichtig das sich die gedanke nöd ine arroganz umwandlet.
Mir alli sind sicher gschid und hend öppis gleistet, aber das hed eus nur uf das vorbereitet wo alles no chunnt.
Die vier Jahr hend es Fundament gschaffe und jetzt zum erste mal i eusem lebe, lieht d verantwortig ganz bi eus selber. Zum erste mal entscheided mir wies witergaht und was mir uf das fundament wend ufbaue. So kitschig s’folgende au töne mag:
Mitme lachende und eme brüelende aug luegemer uf die 4 jahr ade KSWE zrugg. Dankbar für alles womer gha hend, aber au chli wehmüetig das eusi zit da eso jetzt verbi isch.
Trotzdem: mir freued eus uf das wo chunt! Gratulation a alli wos packt hend, ihr chönd stolz si uf euch.»
Noa Dibbasey und Sina Schmid, beide G4I
